NAGA CITY- Nag-aandam na an manhamiento kan Southern Luzon Command (SOLCOM) sa posibleng opensiba na gigibuhon kan mga rebeldeng New People’s Army (NPA) makalihis an kanselasyon kan peacetalks sa pag-ultanan kan gobyerno asin komunistang grupo.
Ini igwang koneksyon sa haros sunod-sunod na engkwentro sa pag-ultanan kan militar asin rebeldeng grupo na nairehistro sa probinsya nin Batangas.
Sa entrevista kan Bombo Radyo Naga ki Col. Teody Toribio, tagapagtaram kan SOLCOM, sinaysay kaini na mas pinahigot pa ninda an ginigibong kampanya asin operasyon kan mga militar para masierto an katuninongan asin seguridad sa bilog na Southern Luzon.
Dae suboot matugot an mga militar na magkaigwa nin kariribukan sa mga lugar na saindang nasasakupan.
Dae pa nahahaloy kan maarestar kan mga militar an 12 mga pigtutubudang mga rebelde makalihis an bakbakan sa nasambitang probinsya.
Subanggi man, 14 mga NPA an nagadan makalihis na makaengkwentro an tropa kan 730th Combat Group kan Air Force asin PNP Nasugbu sa parten kan barangay Aga sa banwaan nin Nasugbu.
Nagpaparahay pa suboot ngonyan an duwang rebelde na nairido sa bakbakan siring man an tolong persona sa lado kan tropa kan gobyerno.
Hinahalat pa suboot ngonyan kan mga otoridad na igwang magkua sa bangkay kan nagadan na mga rebelde sa nasambitang bakbakan na naghaloy nin haros 30 minuto.
