NAGA CITY- Gadan an sarong soldados mantang nairido man an tolong iba pa makalihis an haros magkasunod na pananambang asin engkwentro sa pag-ultanan kan pigtutubudang mga miyembro kan New People’s Army (NPA) asin militar sa Lopez, Quezon.
Sa entrevista kan Bombo Radyo Naga ki Capt. Patrick Jay Retumban, chief kan Division of Public Affairs Office (DPAO), 2nd Infantry Division, Philippine Army, sinaysay kaini na pasiring kuta na sa barangay Silang an military vehicle lunad an anom na mga soldados hale sa 85th Infantry Battalion, para sunduon an saindang mga pag-iriba na nagkondusir nin civic action sa nasambitang lugar pasado alas-8:30 subanggi.
Mantang binabagtas suboot kan nasambitang military vehicle an bulod na parte kan Barangay Silang kan bigla na sanang nagsabog an sarong improvised explosive device (IED) na pigsundan pa nin haros 15 minutos na riribayan nin putok sa pag-ultanan kan mga soldados asin NPA.
Dae na nag-abot pa nin buhay sa ospital an biktima na binistong si Cpl. Nilo Juan na napuruhan sa pangyayari mantang nairido man an tolo pa kaining mga pag-iriba na tinamaan suboot nin shrapnel.
Narekober sa pinangyarihan kan ambush an mga IED asin an cord na ginamit sa pagpapasabog.
Mientrastanto, matapos an pananambang sa barangay Silang, nakabakbakan man kan reinforcement group kan militar an pigkakarkulong 20 mga rebelde na nangyari sa Barangay Cogorin sa parehong banwaan.
Sa ngonyan, nagpapadagos pa an pigkokondusir na pursuit operation kan mga militar para lapagon an nagdulag na mga miyembros kan makakawalang grupo.
