Pinanindugan ni Senate President Win Gatchalian na magpapadagos an impeachment trial ni Vice President Sara Duterte maski igwa nang inihain na petisyon sa Supreme Court na nagkukuwestiyon sa proseso kan paglilitis.
Segun ki Gatchalian, mayong iniluwas na temporary restraining order (TRO) an Korte Suprema kaya mayong rason tanganing pahingalon an impeachment trial.
Sa hapot kun paano magpapadagos an paglilitis kun pipilion kan defense panel na dai mag-atender sa masunod na mga pagdangog.
Sinabi ni Gatchalian na obligasyon kan impeachment court na ipagpadagos an paglilitis asin magdesisyon basta igwa nin quorum kan senator-judges. Idinugang niya na desisyon kan defense panel kun pipilion kaining dai mag-atender.
Mantang, sinabi man kan Senate President na mayo siyang nadadangog na plano hale sa mga senator-judge na dai mag-atender o magpartisipar sa botohan. Segun saiya, maski an mga miyembro kan minority padagos na nag-aatender sa mga aktibidad kan Senado.
Manungod man sa isyu kun dapat talagang mag-atender asin magpartisipar an mga senator-judge tanganing maging kwalipikado an saindang boto, sinabi ni Gatchalian na susundon kan impeachment court an nagin ruling kaini.
Kun magluluwas man nin bagong desisyon an Supreme Court manungod sa mga petisyon, sinabi ni Gatchalian na saka na ninda ini hahahapunan kun igwa nang aktuwal na ruling.
Sa ngunyan, malinaw segun saiya an posisyon kan impeachment court: tuloy an impeachment trial.
