Kinumpirma ni Senador Robin Padilla na nakaresibe siya nin subpoena hale sa Department of Justice (DOJ).Ini may koneksyon sa preliminary investigation manungod sa saiyang pig-aakusaran na pagtabang ki Senador Ronald “Bato” Dela Rosa na makadulag sa Senado kan Mayo.
Inako ni Padilla na nakisakay sa saiyang sasakyan si dela Rosa mantang pahali ini sa compound kan Senado. Tinawa doon kan senador na mayong sala sa saiyang ginibo huli ta bako man puganti si dela Rosa asin mayo nin lokal na warrant of arrest an senador kan panahon na tabangan niya ining makasakay sa saiyang behikulo.
Sigon ki DOJ spokesperson Atty. Polo Martinez, nagsairarom na pagsusuri an reklamo bilang primerong lakdang tanganing maaraman kun may sapat na basehan para sa pormal na preliminary investigation.
Sinabi man ni Martinez na naihatod na an subpoena ki Padilla asin Lt. Col. Jean Alla Yasin Robles dakol alas-2:30 nin hapon sa Senado kasuudma, katakod kan reklamo manungod sa paglapas sa Presidential Decree 1829 o obstruction of justice ni Padilla.
Pinapanimbag kan DOJ si Padilla asin inoobligar na magsumiter nin counter-affidavit sa Setyembre 25 asin Oktubre 9 .
Magigirumduman na huring nahiling si Dela Rosa kan nag-atender sa sesyon kan Senado kan Mayo 13 alagad nagdulag ini kan Mayo 14 matapos an pagkaputukan sa laog kan Senado.
Si Dela Rosa igwa nin “warrant of arrest” hale sa International Criminal Court huli sa saiyang papel bilang dating hepe kan Philippine National Police (PNP) kan ipinapautob an “war on drugs” ni dating Presidente Rodrigo Duterte.
