NAGA CITY- Pabor suboot sa Philippine National Police (PNP) an lakdang ni Presidente Rodrigo Duterte na pagbwelta sainda kan subpoena power.
Ini an sinaysay ni P/Supt. Venerando Ramirez kan Camarines Sur Police Provincial Office (CSPPO) sa pakikipag-olay kan Bombo Radyo Naga.
Sa presente, segun saiya, dae pa ninda nareresibe an guidelines manungod sa pinirmahang ley kan presidente.
Alagad makakatabang suboot ini sa PNP urog na sa pagpaparikas kan proseso sa mga kasong kriminal.
Hagad man ni Venerando na lugod, dae maabuso an nasambitang poder na itinao sainda kan hepe-ehekutibo.
Kun babalikan, pinirmahan ni Presidente Duterte an Republic Act 10973 na nagtataong otoridad sa PNP chief, PNP Criminal Investigation and Detection Group (CIDG) director asin CIDG deputy director for administration na mag-summon o magpa-apod nin mga indibidwal asin dokumentong kinakaipuhan sa imbestigasyon sa mga kapot kaining kaso.
Nakapalaog pa sa ley na pwedeng sangatan kan PNP-CIDG nin kasong indirect contempt sa Regional Trial Court (RTC) an siisay man na masayuma o dae mautob sa saindang subpoena.
