NAGA CITY- Gadan an supervisor nin sarong vape bar mantang irido man an limang iba pa makalihis an nangyaring karambola sa ciudad nin Naga.
Sa nakuang impormasyon kan Bombo Radyo Naga, nabistado an nagadan na si Jeric Ricasio, 20-anyos.
Basado sa report hale sa Naga City Police Office (NCPO), nagluluwas suboot sa saindang inisyal na imbestigasyon na pasado alas 3:00 nin mag-uumagahon kan maglaog sa vape bar sa Barangay Sta. Cruz an mga suspek na binistong sinda Leo Angelo Bas, 36-anyos; Aaron Paul Bas, 36-anyos asin Carlo Franco Bas, 30-anyos.
Nag-order suboot nin sarong bote nin arak an mga suspek alagad pig-abisuhan an mga ini na dae na pwede pang mag-order huli sa pigpapautob na regulasyon sa laog kan establisimiento.
Makalihis sana an duwang oras, pinurbaran suboot kan mga suspek na mag-order liwat nin arak morder ulit ng alak alagad dae na an mga ini pigtugutan kan waiter na si Joshua Francisco, 19-anyos.
Sinasabing digdi na sinakal ninda Leo Angelo asin Carlo Franco si Francisco na tulos man na pigsaway kan saro pang waiter na si Aladino Fernandez, 21-anyos.
Nadangog man suboot kan waiter an kariribukan sa laog kan cr kun saen sinasabing nahiling na sinaksak ni Aaron Paul an maysadiri kan bar na si Recasio.
Susog pa sa report, nilapag pa ni Fernandez an mga nagdulag na suspetsado alagad sinaksak suboot ini sa mag-ibong na braso.
Idinalagan pa ini sa ospital kaibanan an maysadiri kan vape bar alagad pigdeklarar nang dead on arrival si Recasio.
Mientrastanto, pahayag man suboot kan cashier kan bar na si Jona Mae Sales, 21-anyos, nilalay kan mga pag-iriba kan mga suspek na sinda Bonita Dela Cruz, 33-anyos asin Lorna Tiaba an bag ni Recasio na naglalaog nin mga personal na gamit arog kan gadget asin kwarta.
Sa ngonyan, padagos pang hinahanap an duwang babae mantang inaandam na kan pulisya an kasong Homicide, Physical Injuries asin Theft laban sa mga suspetsado.
