NAGA CITY- Limitado an suplay kan mga honey gikan sa stingless bees sa CBSUA Pili tuyong nakakaeksperyensiya nin tag-uran sa nasyon.
Sa entrevista kan Bombo Radyo Naga ki Johanna Cordial, Director kan Regional Apiculture Center, CBSUA-Pili, sinaysay kaini na tuyong rainy season limitado sana an pagproduce nin honey tanganing dae maapektaran an saindang colony.
Sigun pa ki Cordial, normal ini sa saindang lado na nag-aataman nin mga stingless bees orog na ta makakabawi man sana soboot sinda pag-abot nin summer.
Dugang pa kan opisyal, sa panlalamasa man kan Bagyong Uwan sa Bicol Region dae man soboot nadanyaran an saindang mga ataman alagad an source kan pagkakan an medyo nawara huli ta kadakol an naputol na puon kan kahoy siring kan kabatagan asin iba pang seasonal na kahoy.
Sa ibong kaini, na-sustain man an saindang pangangaipuhan orog na ta an mga bees an igwang nakareserba na pagkakan sa saindang harong.
Apwera digde, yaon man an saindang pagtabang siring kan pagtimpla nin mga sugar na nagseserbeng alternatibong pagkakan sa mga stingless bees.
An mga nasambitan ng lakdang an kaipuhan tanganing nasa marhay na kamugtakan an mga stingless bees na kaipuhan sa mas marhay na produksyon.
Sa ngunyan, pigsierto na sana ni Cordial na padagos an saindang pagbilog nin mga lakdang siring kan pagdevelop pa kan Regional Apiculture Center para sa mas marhay na serbisyo.
