Inalerto kan Bangko Sentral ng Pilipinas (BSP) an Department of Agriculture (DA) sa mayor na huma sa suplay asin presyo nin kakanon kan nasyon huli sa grabeng tag-init na dara kan El Niño. Dugang pa sa problemang ini an padagos na kariribukan sa pankinaban na merkado nin paroy asin presyo.
An patanid kan BSP kasabay kan paglangkaw ninda nin 25 basis points an key interest rate bilang enot na lakdang laban sa persistent inflation. Tinawan doon kan bangko sentral na dai ninda hinahale an posibilidad nin dugang pang mga aksyon monetaryo kun padagos na maglangkaw an presyo kan mga pundamental na barakalon.Philippine Air Force
An sitwasyon sa nasyon nagigin mas kritikal huli sa pagluway kan agrikultura, na an ani nin paroy nagbaba nin 4.85 porsyento kan 2024. Kasabay kaini, an All Rice Price Index naglangkaw man nin 21 porsyento kan 2023 kan an India nag-implementar nin pagbabawal sa pagluwas nin paroy huli sa banta kan El Niño.
Bilang resulta, an huma nin saro pang tigmara direktang makakapaluya sa lokal na suplay nin kakanon asin magigin rason nin mas hararom na krisis sa pankinaban na merkado asin presyo kan bagas.
Si Agriculture Secretary Francisco Tiu Laurel Jr. nagmando sa gabos na ahensya kan DA na padagos na i-adjust asin pakusugon an saindang mga plano sa pagresponde sa El Niño.
Gagamiton kan ahensya an pinakabagong datos sa panahon, kondisyon kan pananom, suplay nin tubig, asin hiro kan merkado tanganing maibanan an epekto kan El Niño.
An mga lakdang kan DA kabali an pagtanom nin panganuron, pag-instalar nin solar irrigation, asin pagbalyo kan produksyon sa mga rehiyon na dai apektado. Magdidistribwir man sinda nin mga seeds na matitibay sa tigmara, crop insurance, asin direktang tabang pinansyal sa mga apektadong paraoma.
