Nagpaplano an Pilipinas na magtugdok nin coal terminal kun sain mapoproseso asin mablend an lokal na coal para sa pag-generate nin kuryente, tanganing mabawasan an pagsarig kan nasyon sa mga inaangkat na coal gikan sa Indonesia.
Segun ki Energy Sec. Sharon Garin, pig-iinkaminar an pribadong sektor na pangenotan an proyekto.
An gobyerno puwede man maging minority shareholder tanganing makapagtao nin regulatory oversight.
An Pilipinas saro sa mga nasyon na pinakadakul an pagsarig sa coal para sa power generation sa Southeast Asia, kun sain an coal haros 60 porsyento kan energy mix kan nasyon.
Kapansin-pansin na 95 porsyento kan supply kan coal sa nasyon inaangkat, asin an Indonesia an nagsusuplay nin haros 99 porsyento kaini.
Dagdag pa ni Garin, dakula an pagsarig kan Pilipinas sa coal gikan Indonesia huli ta ang kalidad kaini angay sa mga boiler asin iba pang kagamitan na ginagamit kan mga coal-fired power plant sa nasyon.
An Semirara coal mine sa Antique, na nagpoprodyus kan kadaklan kan lokal na coal, naggagibo nin low- hasta medium-rank sub-bituminous coal na medyo mababa an calorific value.
Alagad may mga lokal na power plant na dinisenyo tanganing mas episyenteng mag-operate gamit an coal na mas halangkaw an calorific value.
Sa proposed coal terminal,linalaoman ni Garin na mas mapapahewas kan nasyon an paggamit kan coal na ginigibo sa Semirara.
Kinokonsiderar kan Department of Energy an sarong lugar sa Mindanao para sa coal terminal, alagad an eksaktong lokasyon depende pa sa feasibility study.
Kinakaipuhan na harani an pasilidad sa sarong pantalan tanganing mapadali an paghawak asin pagbiyahe kan coal.
An paghinguwa kan Pilipinas na mabawasan an pagsarig sa imported coal nangyayari habang naghihiro man an Indonesia na sentralisaron an pag-export kan mga importanteng produkto, kaiba an coal.
Sa irarom kan bagong export rules kan Indonesia, kinakaipuhan kan mga kompanya na i-report sa sarong state firm an saindang mga aktibidad sa pag-export kan coal.
