Nagtitinir na maluya an paggasta kan mga konsyumer ngunyan na holiday, sa ibong kan paparani na aldaw kan Pasko.
Ini an basado sa realtime monitoring kan Philippine Amalgamated Supermarkets Association (PASA).
Sigun ki PASA President Steven Cua, dae pa guranong nakakapagrehistro an mga supermarket, mall, asin retail outlets kan darakulang bulto kan mga produktong binabakal, sa presente.
Sulamenteng mga bultuhang pagbakal pa sana gikan sa darakulang kumpaniya asin man mga negosyante, an sa ngunyan an nairerehsitro kan mga kumpaniya.
An mga bulk purchase na ini an pawang ipapanao sa mga empleyado komo Christmas giveaways.
Sa ibong man kaini, nilalaoman kan nasambitan ng grupo na mapuon nang magdagsaan an pami-pamilya sa mga retail outlet asin malls, apat na aldaw antes an Pasko o mas halipot pa.
Natuod na soboot an kadaklan na maghidali sa pagbabakal mantang an iba man an mayong bastante na oras tangani magbakal huli sa saindang mga trabaho.
Sa presente, mayo soboot pangangaipuhan tangani ilangkaw an presyo kan mga barakalon. Nagtitinir na bastante an supply asin stock kan mga produkto tangani simbagan an demand o pangangaipuhan sa kabilugan kan holiday season.
