Natukoy na an mga suspek sa likod kan marahas na insidente kan pambabadil sa Bondi Beach sa Australia kan nakalihis na Domingo na naggadan sa 16 na katawo mantang 40 iba pang indibidwal an nagtitinir sa ospital.
Sigun sa local police, nagadan makalihis mabadil kan police sa mismong crime scene an 50 anyos na suspek na sarong ama mantang an saiyang aki na 24 anyos an nasa kritikal alagad stable na kondisyon.
An 50-anyos na suspek an napag-aramang sarong licensed firearms holder asin igwang anom na badil na nakarehistro sa saiyang pangaran, na nanutaran sa mag Bondi Beach.
Nanutaran man sa mismong pinangyarihan kan krimen an duwang active improvised devices alagad kinalaunan, pigdeklarang salbado an lugar makalihis na halion na an mga pampasabog sa lugar.
Makalihis an insidente, nagpakuriyat nin 328 na police officers tanganing magtao nin dugang na seguridad asin suporta para sa Jewish community sa Sydney.
Sa nangyari kayang pambabadil, pinunterya an Jewish community na nagselebrar nin pagpuon kan taunang Hanukkah, an walong aldaw na Jewish Festival of Lights.
