NAGA CITY – Pighahalat pa kan pamayuhan kan Solid Waste Management Office-Naga an duwa pang truck na itatao sa saindang opisina tanganing dagusan nang maibwelta sa dating schedule an pagkolektar kan basura sa syudad.
Sa nagin paghampang sa mga kagawad kan media ni Engr. Joel Martin, pamayo kan nasambitan ng opisina, sinaysay kaini na sa presente igwa na sinda nin walong garbage truck na nagdadalagan asin nagkokolektar nin basura sa enterong syudad.
Kun sain enot na nindang pigbanga sa north asin south kan Naga an duwang bago nindang truck.
Alagad, nadidipisilan pa man giraray sinda na masunod an schedule asin makolektar an basura nin huli ta apwera sa nabawasan an saindang mga trucks an nadugangan man an basura kan mga taga Naga o gikan sa mga basura na pig-aapon gikan sa luwas kan syudad.
Tinawan duon man kan opisyal na an pagdakul kan basura na ini an kakadikit man sana an epekto sa sanitary landfill orog na ta igwa man sinda nin waste diversion technology kun sain gabos na basura an nag-aagi digdi.
Sa nasambitan man na proseso pighihiling kun arin an pupwede pang mapakinabangan liwat.
Dugang pa ni Martin, gabos na mga tarpaulins an piggigibo nindang eco bag mantang an mga clothing o bado an pighahalo man ninda para sa paggibo kan fashion bags.
Katakod kaini, naglalaom man si Martin na mas mapapaamay an pag-abot kan mga garbage truck sa syudad tanganing magamit ini para sa nagdadangadang na selebrasyon kan Penafrancia sa bulan kan Setyembre.
