Sa kabilogan, an selebrasyon kan 2026 na Semana Santa ginibo nin marahay asin ligtas, na may pokus sa pisikal na seguridad. An susi sa kan operasyon iyo an marikas na pagplano asin amay na pagdeploy nin mga tawohan.
Sa intrevista kan Bombo Radyo Naga ki PCOL Gilbert T Farinas, City Director, NCPO, sinaysay kaini na maabot sa 798 personnel hale sa Philippine National Police an nadestino bilang security forces, sa pakikipagtabangan kan mga barangay personnel asin radio groups na nagtabang sa pagtao nin tulos na pagresponde sa manlaen-laen na insidente. Igwa nin nagkapirang medical emergency na tulos na inasikaso kan medical cluster. Sa kabilogan, mayo nin darakulang insidente an naitala sa bilog na Semana Santa.
Sigon ki Fariñas, pig-implementar sagkod Abril 6 an heightened alert status kan PNP ngani na masierto an ligtas na pagbalik kan mga namamanwaan sa saindang mga trabaho. Alagad padagos man giraray an deployment sa mga lugar na parating pigdudumanan kan mga tawo arog kan mga malls asin orog na sa mga transport terminal, urog na ta nagpapadagos pa an school holidays.
Mientrastanto, pigduon ni PLTCOL Josefa Sylvia Zape, PIO, CSPPO na an pinakadakulang deployment ginibo sa Amang Hinulid sa Calabanga. Nagin matrayumpo an nasabing operasyon nin huli ta mayong nairehistrong insidente na may kinaaraman sa nasabing aktibidad.
Dawa ngani igwa nin tolong vehicular accident na naitala kan nakaaging aldaw, piglinaw na nangyari ini sa ibang banwaan asin dae konektado sa deployment sa Amang Hinulid. Katakod kaini, ginibo an augmentation of personnel sa paagi nin pagpadara nin mga personahes hale sa headquarters pasiring sa saindang kanya-kanyang munisipyo kun sain sinda nakaistar, tanganing mapakusog pa an presensya kan pulis sa mga lokal na istasyon. Sa mga lugar na may kakulangan nin mga tawohan, an mga tawohan pinagbanga nin tama tanganing maseguro an pantay na distribusyon.
Naka-standby man an mga medical team tanganing tabangan an mga deboto na naglalakaw pasiring sa Amang Hinulid. Mismo an Provincial Director an nagkondusir nin inspeksyon sa lugar tanganing masierto an kaayusan kan deployment asin an kaligtasan kan mga nag-aatender. Sa kabilogan, matoninong an selebrasyon, na risang-risa an disiplina asin debosyon kan mga partisipantes, asin mayong naitala na disturbo o insidente.
