NAGA CITY- Pigbilog na an Task Force Paputok sa siyudad nin Naga.
Sa entrevista kan Bombo Radyo Naga ki Renne Gumba, Public Safety Office Naga Director, sinaysay kaini na an saindang Task Force Paputok an sarong Enter Agency. Boot sabihon, bako sana ining local na gobierno alagad kabali na digdi an National Agency siringkan BFP, PNP, DTI asin iba pang ahensya.
Apwera sa enot ng naisagibo na Organization meeting, naisagibo naman an training, orientation, pagproseso asin permit sa mga mapabakal nin paputok. Siringman, pigpreparar na an otorisadong lugar kun saen sinda pwedeng magtinda kan siring na produkto.
Kasabay kaini, pigkundusir man an breifing sa mga Barangay Opisyal kan siyudad tanganing maisplikar sa saindang kun ano an mga panundon kan gobyerno lokal asin mga ahensiya kan gobyerno sa pagpabakal nin mga paputok ngunyan na kapaskuhan asin sa maabot na bagong taon.
Mientrastanto, pinagpaplanohan man kan saindang lado na makalihis an bagong taon, liwat matiripon an mga Task Force Paputok partikulemante na an mga barangay opisyal tanganing maaraman an total na numero kan mga maikukurit na naputukan, asin pira an nairehistro na nagpabakal nin iligal na paputok.
Kamawotan man ni Gumba na matatawan nin pagbisto an mga barangay na mayong maikukurit na naputukan asin an mga barangay opisyal na mahigos magdakop kan mga nagpapabakal nin iligal na paputok asin mga nagpapaputok sa bakong designated areas.
Sa ngunyan, liwat man nagpagirumdom an opisyal sa publiko orog na sa mga magurang na bantayan an saindang mga aki enkaso dae malikayan na magpaputok asin pig-enkaminar kaini na hasta pupwede dae na sana magpaputok tanganing makalikay sa anuman na insidente.
