Ipigheras kan Alliance of Concerned Teachers (ACT) na an tulos na pagpasar kan Teacher Protection Act an tanganing matawan nin magkakanigong legal na proteksyon an mga paratukdo sa pampublikong eskwelahan.
Sa entrevista kan Bombo Radyo Naga ki Ruby Bernardo – Chairperson, Alliance of Concerned Teachers
haloy nang pigtutulod an nasambitan na bill para masimbagan an mga inaatubang na reklamo kan mga paratukdo sa pag-otob kan saindang trabaho.
An bill may katuyuhan na magbugtak nin malinaw na linya sa pag-ultanan kan tamang disiplina sa mga estudyante asin an aktuwal na pang-aabuso. Kabali sa probisyon kaini iyo an preliminary investigation sa school level asin pagtao nin pagkakataon sa mga paratukdo na ipresentar an saindang lado bago magpadagos an kanya-kanyang kaso.
Tinawang-duon ni Bernardo na dae katuyuhan kan bill na paluyahon an proteksyon kan mga kaakian sa irarom kan Republic Act No. 7610. Envez, sisiguraduhon kaini na papaninimbagon an tunay na perpetrator mantang an mga paratukdo na nagsasagibo nin lehitimong disciplinary actions dae basta-basta mapapasairarom sa reklamo.
Dugang pa kaini, importante na magkaigwa nin legal assistance an mga paratukdo na napapaatubang sa kaso, urog na ta dakulang gastos an pag-hire nin abogado. An bill piglalaoman man na makakatabang sa pagpapauswag kan moral, mental health, asin kalidad kan pagtukdo kan mga paratukdo.
Mientrastanto, nangapudan man an ACT na dagdagan an starting salary kan mga paratukdo sa ₱50,000 asin dagdagan an Personal Economic Relief Allowance (PERA) hale sa ₱2,000 pasiring sa ₱5,000. Hagad ni Bernardo sa mga mambabatas na suportaran an mga bills na matao nin magkakanigong proteksyon asin benepisyo sa mga paratukdo.
