NAGA CITY- Sa ibong kan labing ash fall na naeeksperyensyahan sa probinsya nin Albay huli sa padagos na pag-aalburuto kan Bulkang Mayon, dae na nagduwa-duwa pa an lokal na gobyerno kan ciudad nin Naga na idagos an saindang planong pagtatao nin tabang sa mga evacuees sa nasambitang probinsya.
Sa entrevista kan Bombo Radyo Naga ki Allen Reondanga, pamayo kan City Events Protocol and Public Information Office (CEPPIO), sinaysay kaini na mas kaipuhan ngonyan nin tabang kan mga apektadong residente makalihis na itaas na an estado kan bulkan sa alert level 4 suodma.
Katakod kaini, bandang alas 5:00 subagong aga kan magpasiring sa Albay an tolong truck hale sa ciudad kargadon nin mga food asin non-food items arog kan bagas, de lata, noodles, face mask asin mga hygiene kits.
Kabale man digdi an duwang water lorry para magtao nin malinig na tubig sa mga evacuees.
Sigon man ki Annabelle Vargas, pamayo kan City Social Welfare and Development (CSWD), ipapanao an nasambitang donasyon sa mga banwaan nin Camalig asin Guinobatan siring man sa ciudad nin Ligao na labing apektado ngonyan kan abnormalidad kan bulkan.
Mientrastanto, padagos man an pag-ako nin donasyon kan LGU-Naga sa paagi kan piglunsar na programang #TabangMayon na obhetong makatipon nin tabang para sa mga pamilyang pig-ebakwar huli sa huma na dara kan Bulkang Mayon.
