Nagkasundo an Thailand asin Cambodia na palawigon an saindang untok-putukan makalihis an limang aldaw na sagupaan sa hangganan kan nakalihis na bulan na ikinagadan kan dae mababa sa 43 katao.
Nag-ugat an girian sa haloy nang kariribokan sa mga templong nasa hangganan kan duwang nasyon.
Naipagkasundo an untok-putukan sa tabang ni Malaysian Prime Minister Anwar Ibrahim, sa pakikipagkoordinar ki United States President Donald Trump asin man mga tagapamagitan gikan sa China.
Natapos an tulong aldaw na pag-uulay sa Kuala Lumpur kan nakalihis na Huwebes sa paagi kan sarong kasunduang mapauntok sa gabos nin klase kan kadahasan, kabali an mga pag-atake sa mga sibilyan asin mga target na militar.
Susog sa tinintaang pahayag, an nasambitan ng kasunduang an dae dapat balgaron sa ano man na pagkakataon.
Kabali man digde an pagpugol sa hiro kan tropa asin mga patrol sa kalabaan kan 800-kilometrong hangganan.
Sigun ki Cambodian Defense Minister Tea Seiha, yaon an saindang presensya para sa detalyadong kasunduan nin untok-putukan tangani wakasan an pagdanak nin dugo.
Sinabi man ni Thai Deputy Defense Minister Nattaphon Narkphanit na kaipuhan nin sinseridad asin man tunay na kooperasyon gikan sa magkaibong na lado.
Pigtalaan man an saro pang pag uulay sa laog kan sarong bulan. Nag promisa an duwang nasyon na iiwas sa pagpapalaganap nin salang impormasyon tangani dae na lumala pa an tensyon.
Inako ni United States Secretary of State Marco Rubio an kasunduan asin man inapod ining “importanteng lakdang pasulong.”
Alagad pinatanidan ni US ambassador to Malaysia Edgard Kagan na halangkaw pa man an antas kan tensyon asin man dae pagkakatiwalaan, kaya man importante an malinaw na direktiba gikan sa mga lider pababa sa mga suldados sa hangganan.
Pinag gikanan kan tensyon an magkaibang pag-angkin sa mga templo sa hangganan, na nag-ugat sa dae malinaw na mapa kan mga kolonyalistang Pranses kan nakalihis na taong 1907.
An sagupaang ini an pinakamarahas sa rehiyon sa nakalihis na labi sa sarong dekada, na nagresulta sa pag ibakwar kan labi sa 300,000 katao gikan sa magkaibong na lado.
