NAGA CITY- Nagpapadagos ngunian an clearing operation kan tropa kan gobyerno makalihis mairehistro an engkwentro sa pagultanan kan mga militar asin pigtutubudang mga rebelde sa Sitio Matakla Lidong, Barangay Bulawan, Sipocot, Camarines Sur.
Sa nagunong impormasyon kan Bombo Radyo Naga, napag-araman na nakasabatan kan tropa kan Bravo Coy, 9ID, PA an kinakarkulong maabot sa pokumas humenos 10 armadong kalalakihan.
Katakod kaini, tulos na nagkaigwa nin riribayan nin putok na naghaloy nin haros 40 minutos antes dagos na nag-atras an nasambitan ng grupo.
Mayo man nin nairehistrong casualty sa parte kan tropa kan gobyerno mantang padagos man na inaaram kung may mga nairidu sa grupo kan mga rebelde.
Sa ngunian, tulos man na nagkundusir nin choke point operations an mga otoridad para masusog an nasambitan ng mga rebelde.
Mientrastanto, tolong magkakasunod man na kasulo an nairehistro kan Bureau of Fire Protection (BFP)-Bicol sa manlaen laen na parte kan rehiyon.
Sa ipinaabot na impormasyon ni SFO4 Aramis Balde, tagapagtaram kan BFP-Bicol, enot na nairehistro an kasulo sa banwaan kan Guinobatan Albay, asin sinundan ini sa mga banwaan kan Canaman asin Bombon probinsya nin Camarines Sur.
Sigon sa opoisyal, an napabayaang kandila an rason kan nasambitan ng mga kasulo alagad mayo man nin nairehistrong casualty huli ta marikas man na nagresponde an mga otoridad.
