Pigkokonsiderar nang resigned o nagbutas na sa serbisyo sa Philippine National Police (PNP) si dating PNP chief Nicolas Torre III, makalihis kaining akuon an posisyon komo bagong General Manager kan Metropolitan Manila Development Authority (MMDA).
Nanumpa na man si Torre sa saiyang bagong posisyon, kan nakalihis na Biyernes, Disyembre 26, 2025.
Sigun ki National Police Commission (Napolcom) Vice Chairman Rafael Vicente Calinisan, an pagtukaw ni Torre sa MMDA an buot sabihon “ipso facto resigned” o awtomatikong nagbutas sa pwesto kaini sa kapulisan.
An pagbubutas ni Torre an mataong dalan tangani na magin ganap ng hepe kan PNP si Lt. Gen. Jose Melencio Nartatez Jr. asin makukua man kaini an pinakahalangkaw na ranggong heneral na dating kapot ni Torre.
Si Torre an primerong alumnus kan Philippine National Police Academy na namayo sa PNP, na parte kan “Tagapagpatupad” Class of 1993. Nabisto man ini sa saiyang labi sa tulong dekada na serbisyo sa kapulisan.
Nagin lider man si Torre kan Criminal Investigation and Detection Group (CIDG) na saro sa saiyang mga nagin importanteng papel.
Marurumduman, nagkaigwa nin dae pagkakaintindihan si Torre asin an Napolcom kan i-reshuffle ni Torre an mga senior police officials.
Mapadagos kuta si Torre sa saiyang pwesto komo PNP Chief kun sinayumahan kaini an MMDA, hasta sa umabot ini sa mandatory retirement age na 56 sa Marso 2027.
