Makundusir nin duwang aldaw na transport strike an sektor kan transportasyon sa papaabuton na Marso 19 hasta Marso 20 sa bilog na nasyon.
Sa intrevista kan Bombo Radyo Naga ki Ramon Rescovilla an Spokesperson kan PISTON Bicol, makikisumaro an Piston Bicol sa gigibuhon na trasport strike sa Metro Manila kaibanan an grupo ni Mar Valbuena asin iba pang grupo kan transportasyon.
Sigon ki Rescovilla, aprubado na an pisong dagdag na pamasahe alagad kulang an piso huli sa sobrang itinaas kan presyo kan produktong petrolyo na kun sain P5 an saindang kahagadan asin kaipuhan ng aksyunan kan gobyerno an padagos na pagtaas kan presyo kan produktog petrolyo lalong lalo na sa rehiyon bicol.
Obheto kan aktibidad na ini na madangog kan gobyerno an saindang kahagadan na ibasura an oil deregulation law, E-Vat asin Oil excise tax tanganing makabalik sa gobyerno an kontrol sa presyohan kan fuel asin magianan an mga pilipino asin daing gayo manganaan sa epekto kan crisis.
Sigon pa sa opisyal, an mga darakulang kumpanya sana nin langis an igwa nin kapangyarihan na magtakda kan presyo kan produktong petrolyo. Kahagadan na san kan opisyal na suportaran kan publiko an gigibuhon nindang aktibidad asin sa paagi kan dai na pagluwas kun mayo man nin importanteng lakaw sa aldaw kan welga, maipapahiling na kan publiko an suporta kan sa saindang gigibuhon na aktibidad.
