Organisado trangkilo asin matrayumpong naikundusir an traslacion procession kasuudma aldaw nin Byernes Set 11, 2026 sa syudad nin Naga.
Sa intrevista ka Bombo Radyo Naga ki Mayor Jerold B. Peña, Presidente kan Our Lady of Peñafrancia , alas 6:42 nin banggi nakaabot si Inang Peñafrancia sa Metropolitan Cathedral asin naging smooth asin magayon an daloy kan procession.
Basado sa obserbasyon kan alkalde, kadakol man giraray an mga debotong nanutaran na nagsasampa sa andas ni Ina asin ni El Divino Rostro sa ibong kan mahigot na pagpangalad kan simbahan.
Sigon sa alkalde, dai mapupugulan an mga deboto na gibuhon ini huli ta igwa nin kanya-kanyang paagi an mga deboto na maipahiling an saindang debosyon ki Inang Peñafrancia.
Dagdag pa kan alkalde, pirang dekada ng isinasagibo ini kan mga deboto asin dai kaipuhan husgahan an siisay man na nagsasampa sa andas ni ina huli ta, parte ini kan saindang kaogmahan asin kan saindang emosyon na manutaran si Ina asin an El Divino Rostro.
Nagtapos an traslacion sa paagi kan sarong Banal na Misa na pinangenotan ni Most Rev. Rex Andrew Alarcon- Archbishop of Naga Metropolitan Cathedral.
Magigirumduman na pinunan an traslascion bandang alas tres nin pagkahapon kan magkasunod na iluwas si El Divino Rostro asin si Inang Peñafrancia sa Peñafrancia Shrine pasiring sa Naga Metropolitan Cathedral.
Inabot nin haros apat na oras an procession asin matiyaga ining inabangan, hinalat, asin inihatod kan mga deboto pasiring sa Cathedral.
Mientrastanto, nagpakol man sa 820,00 an mga debotong nakisumaro sa traslacion procession ngunian na taon basado yan sa datos kan Emergency Operations Center-Incident Management Team (EOC-IMT).
Parte kan pinakadakulang aktibidad kan syudad nin Naga an mga Uniformed Personnel, Religious Groups, manlain -laen na eskwelahan, mga ahensya kan gobyerno asin mga bisitang gikan pa sa manlain-laen na mga lugar.
Pinaglalaoman na sa maabot na sabado mas madudugangan pa an mga debotong mabisita sa syudad nin Naga huli sa aldaw naini ikukundusir an Fluvial Procession na kun sain gikan sa Naga Metropolitan Cathedral, ihahatud si Ina asin an El Divino Rostro pasiring sa Basilica Minore sa paagi ka pagsakay sa salog kan Bicol River.
