Nagbabala si US Pres. Donald Trump na posibleng lumala pa ang digmaan sa Middle East kung mabibigo ang peace process sa Iran, kasabay ng pagtaas ng presyo ng langis at patuloy na tensyon sa Strait of Hormuz.
Sa kanyang pahayag, iginiit ni Trump na mananatili ang puwersang militar ng United States sa rehiyon hanggang sa makamit ang isang kasunduang pangkapayapaan. Binalaan din niya na kung hindi ito magtatagumpay, haharap ang Iran sa mas malawak at mas mabagsik na opensiba mula sa Amerika.
Ayon pa sa kanya, nakaalerto ang mga barko, eroplano, at mga sundalong Amerikano, kasama ang karagdagang armas, upang tugunan ang anumang paglala ng sitwasyon at “sirain ang substantially degraded enemy” kung kinakailangan.
Kasabay nito, iniulat ang pagtaas ng presyo ng langis sa pandaigdigang merkado, na mas mataas kumpara bago ang joint military operations ng United States at Israel sa rehiyon.
Nanatili ring hindi malinaw ang saklaw ng umiiral na ceasefire, lalo na matapos ang malawakang airstrikes ng Israel sa Lebanon na nagresulta sa pagkamatay ng mahigit 250 katao. Dahil dito, tinawag ng Iran na “unreasonable” ang nagpapatuloy na negosasyon.
Samantala, sinabi ni Karoline Leavitt na hindi dapat magpadala ang media at publiko sa mga naratibo ng Iran, at iginiit na iba ang pananaw ng Amerika hinggil sa sitwasyon.
Patuloy ang pagtaas ng tensyon sa rehiyon habang nananatiling nakatutok ang mundo sa posibleng epekto nito sa seguridad, ekonomiya, at suplay ng enerhiya sa buong mundo.
