Pinapa-asegurar ni Senate Committee on Public Services Chairman Senador Raffy Tulfo sa Department of Transportation (DOTr) an padagos na pagbabantay sa presyo kan Dubai crude oil tangani masierto na sa oras na magpakol na ini sa $80 USD per barrel, tulos man maipapanao an fuel subsidy para sa mga PUV drivers and riders.
Sigun ki Tulfo, kadakol na kompanya kan langis an nagpautob nin langkaw-presyo na ₱2.60/litro sa diesel asin ₱1.75/litro man sa gasolina kan nakalihis na June 24 asin June 26 mantang may nakaamba man na langkaw-presyo ngunyan na aldaw na namatean na kan mga apektadong sektor.
Pigsugo ni Tulfo an Department of Energy (DOE) asin DOTr na pag-ulayang maray an dugang na posibleng paagi tangani matabangan an mga PUV drivers na iyo mismong direktang tinamaan sa pagsipa kan presyo nin petrolyo.
Pig inkaminar man kan senador an darakulang kumpanya kan langis na ikonsiderar an pagtatao nin discount sa mga PUV drivers mantang mayo pang kasiguraduhan an nakaambang rollback.
Basado sa 2025 General Appropriations Act, maiheheras sana an fuel subsidy sa mga benepisyaryo kun nag-isyu na an DOE nin sertipikasyon dapit sa aktwal na average price kan Dubai crude oil kun mag abot na ini sa $80 USD threshold kada bariles basado sa Mean of Platts Singapore.
