Binawian nin buhay an 35-anyos na turistang Pinoy huli sa sinapo kaining lugad makalihis na mabudalan kan taxi sa Tsuen Wan West sa Hong Kong.
Sa 11-segundo na video kan insidente na pigpaluwas kan local media pigpahiling kun pano nabudalan asin naipit kan taxi an biktima na paluwas sa saiyang hotel bitbit an saiyang bagahe.
An driver kan taxi an nag-eedad 80-anyos na kun saen nakamate soboot ini nin pagkalula asin nawaran nin kontrol sa behikulo.
Katakod digde, nasa kostodiya na kan mga kapulisan an taxi driver mantang an lawas kan turistang Pilipino an yaon sa Kwai Chung Public Mortuary.
Pigsaysay man kan Department of Foreign Affairs na nagpaabot naman nin tabang an Philippine Consulate General sa pamilya kan biktima asin padagos an saindang pakikipag-koordinar sa mga lokal na otoridad tanganing imbestigaran an insidente.
Mientrastanto, piglalaoman na mag-abot an pamilya kan biktima sa Hong Kong tanganing pakarhayon an pagpuli sa lawas kaini.
Nagpaabot naman nin pakikidumamay an Consulate General sa nabayaan na pamilya kan nasambitan ng biktima.
