Pigkumpirmar ni Senator Risa Hontiveros na pinaghahandaan na man suboot kan United Opposition an saindang pagpili sa standard-bearer o gigibuhong pangtapat ki Vice President Sara Duterte sa 2028 national elections, ini makalihis an naging pag-anunsyar kan bise president na madalagan ini sa pagka president sa 2028 election sa isinagibong press conference kasuodma.
Sigun ki Hontiveros, igwang free-will o kalayaan an siisay man na mag-anunsyar sa saindang kamawotan na magkandidato asin an free-will na ini an sainda man na ginagamit huli ta nasa proseso na man suboot sinda kan pagtalaan kan sadiring timeline bago i-anunsyo kun siisay an mapipili asin madalagan sa pagka-presidente sa saindang grupo.
Dugang pa ni Hontiveros na sa ngunyan padagos sindang nagkakaigwa nin pagkakasararo a pag-uyon sa mga qualifications na sindang hinahanap para sa malaban na presidente.
Kabali na suboot sa mga kwalipikasyon na saindang pighihiling iyo an pa-kakaigwa kan common values kontra sa katiwalian, good-governance, tunay na pagkakasararo asin paglaban sa pambansang soberenya.
Mientrastanto nagpahayag man si Hontiveros kan pagiging bukas asin kahandaan sa pagdalagan sa pagka-Presidente sa 2028 election alagad dae paman suboot opisyal an nasambitan ng anunsyo.
