NAGA CITY- Pig-abisuhan kan sarong University Physician sa probinsya nin Camarines Sur an mga estudyante sa mga dapat gibuhong ngunyan na naeeksperyensiyahan an labing init kan panahon.
Sa entrevista kan Bombo Radyo Naga ki Dr. Sebastian-Roberto Estrada, University Physician kan CBSUA-Pili, na enkaso nakakaeksperyensiya nin labing init kan panahon sa saindang lugar, nagkakaigwa nin anunsyar an administrasyon na magkakaigwa nin ibang method sa pagpapadagos kan klase, siring kan online class.
Apwera pa digdi, pig-abisuhan man kaini an mga estudyante na pirming magbalon nin tubig inumon, magsulot nin maluluwag na bado asin kun naeeksperyensiyahan an siring na panahon, dae na magluwas sa oras nin 10 nin pagkaaga hasta alas 3 nin pagkahapon orog na kun mayo man nin importanteng kalakawan.
Pigtawan-duon man ni Estrada na tubig an cooling system sa lawas kan sarong tawo, na sarong importanteng bagay ngunyan na tag-init. Kun kaya, kaipohan na marhay na mag-inom nin bastanteng tubig.
Pag-abot man sa mga estudyanteng atleta, mas marhay na mag-ensayo nin alas-6 hasta alas-8 nin pagkaaga.
Likayan man soboot na magkaigwa nin siksikan sa klase.
