NAGA CITY- Sa ibong kan desisyon kan Piston-National na i-cancell an nakatalaan na transport strike ngonyan na aldaw, nanindugan an Condor-Piston Bicol na dagos pa nanggad an untok-pasada sa rehiyon.
Sa entrevista kan Bombo Radyo Naga ki Joel Peliogo, coordinator kan Condor-Piston Bicol, sinaysay kaini na idadagos pa nanggad ninda an untok-pasada huli ta kadakol sindang isyu na dapat na ipaabot sa gobyerno.
Mientrastanto, huli sa enot na anunsyo na pagsuspinder sa 2-day transport strike, binawi ni Camarines Sur Gov. Migz Villafuerte an saiyang enot na abiso katakod kan class suspension sa gabos na lebel sa mga eskwelahan asin opisina kan gobyerno sa probinsya.
Apwera sa CamSur, mayo man ipinautob na class asin work suspension sa ciudad Naga sa ibong kan abiso kan regional transport group.
Kun marurumduman, enot na nagpaluwas nin anunsyo si PISTON President George San Mateo asin No to Jeepney Phaseout Coalition na suspendido an duwang aldaw kuta ng transport strike makalihis suboot na makaolay si Sen. Grace Poe katakod kan saindang mga agrangay laban sa pigtutulod na Jeepney Modernization Program kan Department of Transportation (DOTr.)
