Hiniling ng United People’s Initiative (UPI) sa Supreme Court of the Philippines na isailalim si Pangulong Ferdinand Marcos Jr. sa hair follicle drug test at ilabas sa publiko ang resulta nito, ayon sa petisyong inihain noong Abril 10.
Sa 12-pahinang petisyon, iginiit ng UPI na may karapatan ang publiko na malaman ang kalagayan ng kalusugan ng Pangulo, lalo na kung ito ay maaaring makaapekto sa kanyang kakayahang gampanan ang tungkulin bilang punong ehekutibo.
Ayon sa grupo, mahalaga ang transparency at access sa impormasyon upang mapanatili ang pananagutan sa pamahalaan at makagawa ng wastong paghusga ang publiko.
Binanggit din sa petisyon ang mga ulat na umano’y nakita ang Pangulo sa St. Luke’s Medical Center, pati ang mga pahayag ni Imee Marcos hinggil sa kalusugan ng kanyang kapatid.
Ayon sa UPI, ang mga ganitong pahayag mula sa isang taong may direktang kaalaman ay maaaring magsilbing batayan upang obligahin ang pagbubunyag ng impormasyon kung may seryosong karamdaman ang Pangulo.
Samantala, itinanggi ni Marcos Jr. ang mga isyu ukol sa kanyang kalusugan at tinawag itong “pure shenanigans.” Nagpakita rin siya sa media kung saan nagsagawa siya ng jumping jacks at tumakbo upang patunayang siya ay nasa maayos na kondisyon.
Bukod sa drug test, hiniling din ng grupo na atasan ang pamahalaan na maglabas ng regular at napapanahong medical bulletins kung may kondisyon ang Pangulo na maaaring makaapekto sa kanyang pamumuno.
Kabilang sa mga respondent sa petisyon ang Office of the Executive Secretary at si Dave Gomez.
