Sarong U.S. journalist, na bistado komo si Jeffrey Goldberg, an aksidenteng nai-add sa sarong group chat kun saen pinag-ulayan kan mga halangkaw na opisyal kan Estados Unidos kabali na sinda US Defense Secretary Pete Hegseth asin US Vice President JD Vance, an mga nararani na airstrike kontra man sa mga Houthi rebels sa Yemen.
Pig amin kan White House an security breach kan nakalihis na aldaw nin Martes (Lunes sa America), asin man pigsabi ninda na aksidenteng nadagdag an sarong numero sa sarong chat.
Marurumdumang an mga airstrike, na pig anunsyar ni US President Donald Trump kan nakalihis na Marso 15, an pinangengenutan kan mga detalye na pigheras sa chat, kabali man an impormasyon mapadapit sa mga target asin an oras nin pag-atake, na dae man pigpahayag ni Goldberg.
Sa ibong man kan pagkakaigwa nin leak, pig apod ni Trump an airstrike komk “very effective.” Susog kaya sa nagkuriyat na leak kan Estados Unidos nagpadara soboot si US Defense Secretary Hegseth nin detalyadong impormasyon dapit sa strike, pati na man an oras kan pagsabog kaini sa parte kan Yemen kun saen naka base an Houthi rebels.
Nagkawsa man ini nin matinding kaanggutan sa mga Democrats, kun saen sinabi ni US Senate Minority Leader Chuck Schumer na ini soboot an pagbayolar sa military intelligence asin nag-demand nin tulos na imbestigasyon.
Mantang pigtuyaw man ni US Senator Jack Reed an nagkukuriyat na leak asin man sinabing an kawaran nin pagiingat kan mga gabinete ni Trump an maikokonsiderar na peligruso.
