Paramientras na pigpundo ni U.S. Supreme Court Chief Justice John Roberts an kasugoan kan sarong federal judges na nagsusugo sa administrasyong Trump na magbayad sa mga foreign aid contractors.
An nasambitan ng kasuguan an makalihis magluwas an Chief Justice nin administrative order na nagsusugo kan paramientras na pagpundo sa ginibong desisyon ni U.S. District Judge Amir Ali na iyong nagtalaan nin deadline para sa pagpapaluwas nin mga pondo kan US Agency for International Development (USAID).
Pigtawan-duon pa kan SC na an pagpapapundo an tanganing matawang dalan sa gigibuhon nindang evaluation para sa request kan administrasyong Trump na hadlangan an desisyon kan lower court.
Nagtalaan man si Chief Justice Roberts nin deadline para sa mga nagsasakdal – mga organisasyon na igwang kontrata o nagreresebir kan mga grant gikan sa USAID asin Department of State — na magsumiter nin komento ngunyan na aldaw.
Maruruduman an lakdang na ini an makalihis ipagsugo ni U.S. President Donald Trump an pag-terminate sa ibang mga foreign aid contracts asin grants na igwang kinaaraman sa foreign aid.
Sigun sa U.S. dae kaini kayang sunudon an pigtalaang deadline kan korte, pigtawan-duon an mga pagbabawas sa pondo kan foreign aid komo parte kan agenda ni Trump na ”America First”.
Naglalala an mga hidwaan makalihis magsunad sa lower court an mga aid organization na nag-akusar sa administrasyong Trump kan ilegal na freezing foreign aid sa ibong kan temporary restraining order na ibinaba ni Judge Ali kan nakalihis na Pebrero 13 na nagsusugo sa pagpapaluwas nin mga pondo alagad padagos na pinanindugan ni Trump an pagpapaliban sa mga foreign aid.
Paliwanag kan mga abogado kan administrasyong Trum, igwang karapatan soboot an administrasyon na i-suspend an mga agreements mantang ini an pigre-review kan gobyerno kun ini ba an laog sa bagong polisiya kan administrasyon.
Mientrastanto sa iniluwas na filing kan administrasyon haros 5,800 awards an kinanselar kan USAID award kun saen 500 na sana digde an pigpatinir.
Apwera digde, an Department of State man an nag-terminate nin haros 4,100 na award, asin pigpapatinir an nasa 2,700.
Sinaysay man kan mga opisyal ni Trump na an mga rason para sa pag-terminate kan mga kontrata an kaibahan kan pagtapos sa mga programa na igwang kinaaraman sa diversity, equity, inclusion, asin accessibility.
Sa ibong na parte, pinagtanggol man kan Department of Justice an karapatan kan administrasyon na suspendiron an mga kontrata mantang pigre-review an mga ini tanganing siertuhon na naaayon sa presenteng polisiya.
