Naglobo pa an utang kan gobyerno kan Pilipinas sa P16.63 trillion sa pagtatapos kan bulan kan Pebrero kan presenteng taon, sigun sa Bureau of Treasury (BTr).
Ini an 1.96% o P319. 36 billion na mas halangkaw kumparar kan nakalihis na Enero.
Pira sa mga rason iyo an pagsubli kan gobyerno nin kwarta tanganing suportaran an mas kadakol pang programa asin proyekto.
Sa panlaog na utang kan gobyerno kan nakalihis na Pebrero, nagsakat ini sa P11.22 trillion, mas halangkaw ini nin P139.62 billion kumparar sa naikurit kan nakalihis na Enero.
Sa panluwas na utang man kan nakalihis na Pebrero, naglobo man ini sa P5.41 trillion, mas halangkaw nin P179.64 billion puon kan nakalihis na Enero.
Sa ibong man kan paglangkaw man utang kan gobyerno kan nakalihis na Pebrero, nanindugan an economic managers kan Pilipinas na nagtitinir pa man giraray ining manageable puon kan pandemya.
Pigsierto man ni Finance Secretary Ralph Recto na mayong gayong dapat ikahadit hangga’t marekas na nag-uuswag an ekonomiya kan nasyon kaysa sa utang kaini.
