Nakatalaang magin primerong Italian millennial saint an binatilyong si Carlo Acutis.
Pigtalaan kaya saaga, Setyembre 7 an cannonization ni Pope Leo XIV na ikukundusir sa Vatican na iyong huring lakdang tangani na magin Santo an sarong tao. Si Acutis an nagadan huli sa leukemia kan nakalihis na taong 2006 sa edad na 15.
Pigkokonsiderar kan Vatican an binatilyo komo “Cyber Apostle” mantang an iba man sarong “God’s Influencer”.
Ipinangaki sa London si Carlo kan nakalihis na Mayo 3, 1991 kun saen an mga magurang kaini an Italian asin nagdakula sa Milan.
Nagadan ini sa helang sa Monza, northern Italy. May kaya an saindang pamilya alagad nagin relihiyoso si Carlo kun saen sa hubin na edad kaini, nag aatendir na nin uru-aldaw na misa.
Tinatabangan kaini an mga aking nabibiktima nin bullying asin an mga mayong harong, dinadarhan kaini nin mga pagkakan asin sleeping bag.
Ginamit kaini an saiyang tibay sa computer tangani ipalakop an pagtubod katolika sa online kun saen naggibo ini nin digital exhibition nin milagro.
Binisto kan Vatican an duwang milagro na nangyari makalihis an kagadanan ni Acutis na iyong importanteng rason tangani magin sarong santo.
An enot iyo an pagrahay kan sarong aki gikan sa Brazil na dinapuan nin rare pancreatic malformation asin man an panduwa iyo an pagrahay man gikan sa aksidente kan sarong estudyante gikan Costa Rica.
Sa nasambitan ng kaso, nangadyi an mga kaparientes kan mga may helang ki Acutis kan ini an na-beatified ni Pope Francis sa taong 2020.
Enot ng pigtalaan an cannonization ni Acutis kan nakalihis na Abril 27 alagad huli man sa kagadanan ni Pope Francis sa nasambitan ng bulan, ipinagpapauktaba na sana sa Setyembre 7 kan nagribay na si Pope Leo.
Kasabay na i-cannonize si Italian student Pier Giorgio Frassati na sarong mountaineering enthusiast.
