NAGA CITY– Piglalay kasuhapon kan dae pa nabibistong mga suspek an sarong vault na may laog nin halangkaw sa P200,000 na cash sa branch kan LBC sa Tiaong sa probinsya nin Quezon.
Sa nakuang impormasyon kan Bombo Radyo Naga napag-araman na nahiling na sana kan Costumer Associate kan nasambitan nang opisina na si Kris Ann Lopez, 30-anyos na raot na an pintoan kan pinaglalagan kan vault sa lugar kun kaya tolos na pigkalag-kalag niya an laog hasta sa nahiling niya na nawawara na an vault na may laog na kantidad na haros P228,000.
Tolos man na pinaaram ni Lopez an pangyayari sa mga otoridad kaya tolos naman ining inaksyunan kan mga kapulisan.
Sa inisyal na imbestigasyon kan mga otoridad, napag-araman na may CCTV sa lugar alagad kinatodan na ining gadanon kada matapos an saindang office hours.
Apwera digdi, nakatodan naman kan mga empleyadong ini na pinapabayaan na sanang dae nakakandado an glass door kan nasambitan nang opisina.
Sa ngunyan, nagpapadagos pa an imbestigasyon kan mga otoridad dapit sa insidente.
