NAGA CITY-Viral na ngonyan sa social media an video ni dating Department of Budget and Management (DBM) Secretary asin ngonyan Camarines Sur 1st District Rep. Rolando ‘Nonoy’ Andaya na kua sa tensyon suodma sa PNP station sa banwaan nin Pili, Camarines Sur.
Madadalan sa nasambitang video an pagpupumirit ni Cong. Andaya na makalaog sa hepatura kan Philippine National Police (PNP) kun saen yaon sa laog kaini si Camarines Sur 2nd District Rep. L-Ray Villafuerte.
Nagtaas pa suboot kan saiyang boses si Andaya kan bagaton ini kan mga kabuhan kan Task Force Sagip Kalikasan asin mahihiling man sa nasambitang video an garu pagtilok pa kaini sa sarong lalaki na nagbagat sa saiya sa pintuan kan PNP gamit an saiyang braso.
Tulos man na nasaway kan mga tao sa lugar an kongresista alagad pighumaan pa kaini an nasambitang lalaki.
Marurumduman na suodma kan magkainitan sinda Cong. Andaya asin Villafuerte sa hepatura kan PNP Pili huli sa isyu sa pigrereklamong pagpapadumping suboot kan provincial government sa Barangay San Agustin na parte kan nagpapadagos na runway reorientation kan Naga Airport.
