Ngunyan na naaprubaran na an 2026 national budget, tiwala si Senador Bam Aquino na mapopondohan nin marhay asin maipapautob nin tama an mga importanteng programang pang-edukasyon, siring kan pagtutugdok nin klasrums asin pagpapakusog sa school-based feeding program.
Kabali sa P1.34-trilyong pondo para sa edukasyon – an pinakadakula sa historya kan nasyon – an P68 bilyon para sa pagtutugdok nin mga bagong klasrums asin P25.6 bilyon para sa pagpapahewas sa School-Based Feeding Program.
Nagtagama man an budget nin P67 bilyon para sa pagpapautob kan Republic Act No. 10931, o an ley sa Libreng Kolehiyo na inakda ni Aquino.
Dugang pa digde, pigbali man sa budget an suhestyon ni Aquino na magtagama nin P500 milyon sa irarom kan Maintenance and Other Operating Expenses (MOOE) kan Higher Education Development Program, na partikular na itinalaga para sa pinansiyal na suporta sa Related Learning Experience (RLE) kan mga estudyante sa allied health sciences programs.
Kaiba sa mga estudyanteng makikinabang sa pondong ini an mga nasa allied health sciences programs siring kan Nursing, Medical Technology/Medical Laboratory Science, Pharmacy, Physical Therapy, Occupational Therapy, Respiratory Therapy, Radiologic Technology, Midwifery, Nutrition and Dietetics, Speech-Language Pathology, Human Biology/Pre-Med Allied zprograms, Dentistry, Biochemistry, asin Psychology.
Sa saiyang patara-tara, sinaysay ni Presidente Marcos na sinusuportaran man kan education budget an pagkriar nin teaching asin non-teaching plantilla positions sa mga pampublikong eskwelahan, pati na man an promosyon o reclassification kan mga paratukdo tangani na masierto an de-kalidad na edukasyon.
Siringpaman, liwat na pigtawan duon ni Aquino an saiyang pangapudan para sa mahigot na pagbabantay tangani na masierto na an budget an maipapauyob nin tama asin man an kada piso an magagamit sa tamang programa asin sa kapakinabangan kan mga estudyante.
