Posibleng bukasan liwat kan Commission on Elections (COMELEC) an pagpaparehistro kan mga botante sa papaabuton na bulan nin Oktubre.
Ini an kun matapos na an sampulong aldaw na voter registration para sa Barangay asin Sangguniang Kabataan Elections (BSKE) na iiral hasta sa ika petsa 10 kan bulan nin Agosto.
Sigun ki Comelec Chairman George Erwin Garcia, posibleng bukasan liwat an voter registration sa ikatulong semana kan Oktubre. Magdagos-dagos na ini hasta sa bulan nin Hulyo taong 2026.
Enot nang sinabi ni Garcia na nakatalaang pirmahan ni Presidente Ferdinand R. Marcos Jr. an propwestong nagpapauktaba sa BSKE sa Nobyembre kan masunod na taon.
Alagad padagos pa man daw an poll body sa preparasyon kun igwa nin magsunad nin Temporary Restraining Order sa Korte Suprema na obhetong ulangan an pagpapatulod kan pipirmahang ley.
Magigirumdumang liwat na nagpagirumdom an Commission on Elections (COMELEC) sa publiko na samantalahon an pagbubukas nin voter registration para sa Barangay asin Sangguniang Kabataan Elections (BSKE) paglaog kan Agosto.
Sigun sa poll body, bukas magpuon alas 8 nin pagkaaga hasta alas 5 nin pagkahapon an nasambitan ng voter registration na pinuonan ng ikinasa magpuon kan nakalihis na Agusto 1na madurar man hasta Agusto 10.
Magkakaigwa man nin Special Register Anywhere Program (SRAP) sa National Capital Region asin mga piling lugar sa Region III asin Region IV-A magpuon August 1-7, 2025.
Pig asegurar man kan poll body na may priority lane sa voters registration para sa senior citizens, may mga kakundian asin mga bados.
