Ipinagsugo kan Kataas-taasang Hukuman kan Venezuela, matangang banggi nin Sabado na paramientras na gampanan ni Vice President Delcy Rodríguez an pamamayo sa nasyon, makalihis na ma-arestar kan Estados Unidos si President Nicolás Maduro na ngunyan, nasa a New York City sa Amerika.
Sa desisyon kan korte, sinugo si Rodriguez na akuon asin gampanan sa paramientras na kapasidad an gabos kan tungkulin, kapangyarihan, asin responsibilidad na kaakibat kan posisyon kan Presidente tanganing masierto an pagpapadagos kan gobyerno asin an komprehensibong pagtatanggol sa nasyon.
Siring man, dae pigdeklarar kan mga mahistrado na permanenteng mayo na sa pwesto si Maduro.
Sigun sa ley kan Venezuela, an siring na deklarasyon an mabunsod nin pagsasagibo nin eleksiyon sa laog nin 30 aldaw.
Sa ngunyan, paramientras sana an pagtukaw ni Rodriguez komo pamayo kan estado mantang padagos na pigdadangog an kaso ni Maduro.
