NAGA CITY- Nakalatag na an mga aktibidad na gigibuhon sa ‘Museo ni Jesse Robredo’ sa ciudad nin Naga katakod kan pagselebrar kan ika-60 kompleanyo ni dating Department of Interior and Local Government (DILG) Secretary saaga, Mayo 27.
Sa entrevista kan Bombo Radyo Naga ki Jonel Rabusa, officer in-charge kan nasambitang museo, magkakaigwa suboot nin sarong espesyal na programa para sa pagselebrar kan kompleanyo kan depuntong sekretaryo.
Kabale sa mga ini an ‘Para kay Jesse’ exhibit kun saen ipapahiling digdi kun papano magselebrar kan saiyang kompleanyo an dating sekretaryo kan nabubuhay pa ini.
Bubukasan man suboot para sa mga guided tour an Museo ni Jesse kun saen mahihiling digdi an biography ni Robredo poon kan nagkaklase pa sana ini hasta sa nagin public official siya siring man an huring parte kan saiyang buhay asin an pagbagsak kan piglulunadan kaining eroplano sa kadagatang sakop kan Masbate.
Huli sa 60th birthday saaga ni Robredo, pinagibuhan pa suboot nin senior’s citizen ID kan sarong senior citizen group na para sana sa sekretaryo.
Mientrastanto, nilalaoman man na maatendir si Vice President Leni Robredo sa nasambitang aktibidad na mapuon suboot sa sarong misa pasado alas-8 nin aga asin susundan kan unveiling kan tsinelas art installation.
