Pigsierto kan Kamara de Representantes na bukas ninda na akuon si Vice President Sara Duterte kun magbago an isip kaini asin mag atendir sa ikaapat na State of the Nation Address (SONA) ni Presidente Ferdinand “Bongbong” R. Marcos Jr. sa Hulyo 28.
Sigun ki House spokesperson Atty. Princess Abante kan nakalihis na Lunes na bagaman nagpadara na nin surat an opisina ni Duterte na dae ini maatendir, nagtitinir man giraray na bukas an Kamara sa gabos nin opisyal kan gobyerno, kabali man an Bise Presidente, asin pigtawan duon an importansya na saiyang madangog an taunang report kan Presidente sa Kongreso asin sambayanang Pilipino.
An pahayag ni Abante an kasunod kan kumpirmasyon gikan ki House Secretary General Reginald “Reggie” S. Velasco kan nakalihis man na semana na nagpadara an Office of the Vice President (OVP) nin surat na nagsasabing dae maatendir si Duterte sa SONA sa ikaduwang sunod na taon.
Sa ibong man kaini, sinabi ni Velasco na mapadagos pa man an gabos nin preparasyon, kabali na man an pagtagama nin tukawa sa VIP gallery asin sarong holding room para sa Bise Presidente asin sa saiyang staff enkaso magbago an saiyang isip.
Mayo man na pigtaong rason an OVP sa dae pag atendir kan Bise Presidente, alagad binanggit ni Velasco na gabos kan iba pang imbitadong opisyal kan gobyerno an nakapagkumpirmar na kan saindang pag atendir.
Nakatalaang ilahad ni Presidente Marcos an saiyang SONA sa joint session kan Senado asin Kamara sa plenary session hall kan Batasang Pambansa sa Quezon City alinsunod sa Konstitusyon.
Binabalangkas sa SONA an mga mayor na trayumpo kan administrasyon, pinag uulayan an importanteng hamon sa nasyon, asin man inilalatag an mga polisiya asin propwestong ley para sa maabot na taon.
