Nagkaigwa nin turn-over ceremony kasubagong pagkaaga, Oktobre 26, 2026 kan walong bisikleta hale sa Rotary Club of Naga para sa Naga City Police Office, na obhetong makatabang sa pagmamantinir nin peace and order sa ciudad nin Naga.
Sa intrevista kan Bombo Radyo Naga ki PMAJ Daisy Angeles, Assistant Chief kan Naga City Police Office, sinabi kaini na isinabay an aktibidad sa regular na flag-raising ceremony, kun saen nagin guest speaker si City Councilor Melvin Ramon Buenafe.
Pinangenotan an turn-over ni dating Naga City Police Office City Director PCol Erwin Regallon, kaiba an saiyang mga kaibanan, bilang suporta sa mga programa kan kapulisan para sa seguridad asin kaayusan kan komunidad.
Dugang pa ni Angeles na gagamiton an walong bisikleta kan mga service police sa pag-iikot sa nagkapirang lugar sa ciudad, partikular sa mga komunidad na mas mahirap maabot gamit an mga patrol vehicle.
Sa paagi kaini, ipiglalaoman na mas mapaparani an presensya kan mga kapulisan sa mga residente, mas mapapadali an pagmomonitor sa mga lugar na sakop kan saindang patrol, asin mas mapapabilis an pagtugon sa mga posibleng insidente na nangangaipuhan nin atensyon kan kapulisan.
Dugang pa ni Angeles, makakatabang an mga bisikleta sa pagpapakusog kan police visibility asin sa pagmantinir kan peace and order sa Naga City.
Kasubago man, isinagibo an ceremonial ride tanganing subukan an kondisyon asin pagiging functional kan mga bagong bisikleta. Bago pa man gamiton sa serbisyo, kumpleto na an kada bisikleta sa mga safety equipment, kabilang an helmet asin vest para sa proteksyon kan mga gagamit kaini. Dinikitan man nin mga sticker an mga bisikleta bilang parte kan pagbubugtak nin pagkakakilanlan sa mga ini.
An inisyatibong ini nagpapahiling man kan suporta kan mga pribadong organisasyon sa mga programa kan kapulisan, partikular sa mga inisyatibang naglalayong mapakusog an seguridad sa mga komunidad.
Sa paagi nin dugang na patrol mobility, inaasahan na mas magiging aktibo an mga service police sa paglilibot asin pakikipag-ugnayan sa mga residente, bilang kabtang kan padagos na pagsisikap na mamantinar na salbado asin mapayapa an ciudad nin Naga.
