Pig-anunsyar kan head kan World Health Organization (WHO) na si Tedros Adhanom Ghebreyesus kan nakalihis na Miyerkules (local time) na mabawas nin haros kabanga an saindang executive management team sa tahaw kan matinding kakulangan sa pondo dara kan pagputol nin pondo kan Estados Unidos.
Puon 11, anom na opisyal na sana an mabilog sa bagong pamayuhan kan headquarters kan WHO sa Geneva puon Hunyo 16. Kaibahan sa mga mahali iyo sinda Mike Ryan, Director kan emergency response, asin Bruce Aylward, head kan universal health coverage program asin mga primerong personahes kan WHO kontra COVID-19.
Sigun ki Tedros, dakula an utang na boot kan organisasyon ki Ryan huli sa saiyang importanteng papel kan nakalihis na pandemya.
Matinir man sa bagong team si Jeremy Farrar komo assistant director-general sa health promotion. An saiyang dating posisyon komo chief scientist an ibabalyo ki Dr. Sylvie Briand kan France.
Nagpatanid si Tedros kan nakalihis na Abril na mahampang an WHO sa kakulangan sa sweldo na maabot sa $560 million hasta $650 million para sa taong 2026-2027.
Napag-araman na an Estados Unidos an pinakadakulang donor kan WHO, na nagtao ni $1.3 billion para sa 2022-2023 budget. Alagad kadaklan digde an boluntaryong kontribusyon para sa partikular na proyekto, bakong komo parte kan opisyal na membership dues.
Piglalaomang pag-uulayan an isyung ini sa maabot na taunang World Health Assembly kan WHO sa masunod na semana.
