Nangengenot sinda gymnastics star Carlos Yulo asin tennis star Alex Eala sa mga kandidato para sa 2025 Philippine Sportswriters Association (PSA) Athlete of the Year award.
Nakatalaang ganapon an PSA Awards Night sa Pebrero 2 sa sarong hotel kun saen sinda Yulo asin Eala an igwang halangkaw na tyansang makakua kan nasambitan ng award.
Tunay na nagningning an duwang atleta sa saindang kaniya-kaniyang sports kan nakalihis na taon.
Makalihis na masikwat an duwang gintong medalya sa Paris Olympics kan nakalihis na 2024, nagtitinir na halangkaw an lebel kan kawat ni Yulo sa 2025 season kun saen nakakua ini nin ginto sa men’s vault sa 53rd FIG Artistic Gymnastics World Championships na ginanap sa Jakarta, Indonesia.
Mantang naghirit man ini nin tanso sa floor exercise.
Namayagpag man si Yulo sa floor exercise kan Artistic Gymnastics Asian Championships sa Jecheon, Korea kaibahan pa an tolong tanso sa ibang individual events.
Sa ibong na banda, naggibo nin ribok si Eala na nakalaog sa top 50 sa WTA rankings makalihis an saiyang impresibong ratsada.
Enot na digde an Miami Open kan nakalihis na Marso kun saen nadaog ini kontra sa makusog na Grand Slam players siring ninda Iga Swiatek, Madison Keys asin Jalena Ostapenko.
Nasungkit man kaini an WTA 15 title sa Mexico asin nakakua nin ginto sa 2025 Southeast Asian Games sa Bangkok, Thailand.
Apwera kina Eala asin Yulo, kandidato man sinda golfer Miguel Tabuena, pool player Chezka Centeno asin swimmer Kayla Sanchez.
Tatawan man nin onra an iba pang personalidad asin grupo para sa President’s Award, Lifetime Achievement Award, Executive of the Year asin National Sports Association of the Year siring man an Tony Siddayao Awards asin Milo Junior Athletes of the Year.
