Nabalot kan abo asin masangsang na parong kan asupre an 11 lugar sa probinsiya kan Negros Occidental.
Ini an kasunod kan panibagong pagputok kan bulkan kasuodma, Mayo 14 na naghaloy nin limang minuto, basado sa opisyal na record kan Philippine Institute of Volcanology and Seismology (Phivolcs).
An nasambitan ng pagputok an nagdara nin kabilogang 38 volcanic earthquake kun an pira digde an namatean man kan mga residente.
Sigun sa Provincial Disaster Risk Reduction and Management Council – Emergency Operations Center (PDRRMC-EOC) kan Negros Occidental, naapektaran an kadakol na mga barangay gikan sa La Carlota, Bago, San Carlos, La Castellana, Murcia, San Enrique, Valladolid, Pontevedra, Hinigaran, asin Binalbagan.
Sa Bago City, 23 na barangay kaini an nakaeksperyensiya nin ashfall mantang 11 barangay sa La Carlota City asin siyam na barangay sa La Castellana an nakaesksperyensiya man nin volcanic ash asin masangsang na parong kan asupre.
Sa Bacolod City, 18 barangay kaini an nakaeksperyensiya nin pinaghalong ash particles asin uran.
Kan mag-uumagahon kan Martes, May 13, enot na nagputok an nasambitan ng bulkan asin nagbuga nin tone-toneladang aso asin volcanic materials.
Kinalaunan, kadakol na lugar an naapektaran kan ashfall, na liwat man nasundan sa mga nagsunod na aldaw.
