NAGA CITY- Nagpuon na sa pag-deploy an Police Regional Office sa Bicol Region kan mga security personnel tanganing masierto an kasalbaduhan, katuninongan asin kridibilidad kan midterm elections sa May 12.
Sigun ki PRO-5 Director Brig. Gen. Andre Dizon, nagpakol sa 12,040 personnel gikan sa Philippine National Police (PNP), the Armed Forces of the Philippines (AFP), Philippine Coast Guard (PCG), asin iba pang partner agencies an saindang pig-deployed sa anom na probinsya kan rehiyon.
An mga ini an mabantay harani sa polling centers asin iba pang strategic locations tanganing magserbeng enot na responders tanganing mamantinir an seguridad antes, sa kasagsagan asin makalihis an elections.
Dugang pa ni Dizon na an gabos na kapulisan sa Bicol Region an naka-full alert status asin an gabos na units an na-mobilized siringman naka standby mode sa laog kan nasa 24/7 na operasyon.
Katakod kaini, pigsuspender man an leave kan mga kapulisan sa bilog na durasyon kan elekyson.
Tangani man na masierto an kasalbaduhan asin paz y orden sa elections, an security personnel an ma establisar nin checkpoints tanganing ulangan an mga iligal na aktibidad asin makundusir nin mobile asin foot patrols sa mga key areas.
Sa ngunyan, pig-enkaminar na sana kan hepatura an komunidad na i-report an mga kahina-hinala na hiro o kaya mga election-related violations sa paagi kan saindang pig-establisar na hotlines asin community support centers.
