Kinumpirma an kagadanan kan 153 katawo asin pagkasugad kan labi 20 iba pa matapos an drone attack sa Amiet Market sa Abyei, Africa, sarong rehiyon na pinag-aagawan kan Sudan asin South Sudan.
An pag-atake, na nagtama sa sarong imbakan nin gasolina, nagresulta sa makusog na kalayo na nagpalala kan sitwasyon asin nagdugang sa bilang kan mga biktima.
Sinisisi kan Abyei administration asin kan South Sudan Foreign Ministry an militar kan Sudan sa likod kan makagiram-giram na insidente, na nagresulta sa kagadanan kan mga inosenteng sibilyan asin pagkaraot kan
imprastraktura.
Sa ibong na lado, iginigiit kan sarong senior Sudanese military officer na an mga nagadan mga miyembro kan RSF o Rapid Support Forces asin mga indibidwal na konektado sa fuel smuggling, asin daa bako ninda intensyon na tamaan an mga sibilyan.
An mga lugadan, na an iba nasa kritikal na kondisyon, tulos na dinara sa Ameth Bek Hospital para sa medikal na atensyon.
Huli sa insidente, ipinatawag kan South Sudan an ambassador kan Sudan tanganing ipahayag an saindang grabeng pagkontra asin paghimok na iwasan an anuman na aksyon na makakapahamak sa buhay asin rogaring kan mga sibilyan.
Nangapudan man an South Sudan na resolbaron an mga isyu dapit sa Abyei sa paagi kan diplomatikong pag-urulay o mapayapang negosasyon.
