Maatubang an duwang auditor kan Commission on Audit (COA) an komo testigo sa Impeachment Trial ni Bise Presidente Sara Duterte ngunyan na Lunes.
An dating Intelligence and Confidential Funds Audit Office state auditor na si Roderick Wamil asin an supervising auditor na si Celine May Del Campo piglalaoman na magtestigo dapit sa audit kan Confidential Funds kan Office of the Vice President (OVP) asin Department of Education (DepEd).
Makalihis an testimonya kan duwang auditor, piglalaoman man na mag-aatubang si Marivic Pareja, director kan Legislative Information Resources Management Department kan Kamara de Representantes.
Lead prosecutor Representante Gerville Luistro nagsabi na ngunyan na tutukan kan piskalya an proseso kan pag-audit asin an nadiskubre kan COA, kabali na an Notices of Disallowance na ipinaluwas katakod kan suboot kwestiyonableng paggastos nin confidential funds.
An mga retiradong manager kan sangay kan LandBank na si Violeta Constantino asin Nenita Camposano na dati nang nagtestigo, na pigdedetalye an pag-encash kan mga tseke kan Treasury na nagkakantidad nin P612.5 milyon para sa OVP asin DepEd kan si VP Sara iyo an sekretaryo kan departamento.
Sa lindong kan Article I kan impeachment complaint, inaakusaran si Sara Duterte sa suboot salang paggamit kan P612.5 million na confidential funds na itinagama sa OVP asin DepEd.
Segun sa piskalya, an pag-liquidate kan pondo kasabay kan mga kwestiyonableng acknowledgement receipts na may laog na mga pangaran arog kan “Mary Grace Piattos,” “Milky Secuya,” asin “Kokoy Villamin,” kaiba an ginatos na iba pang pangaran na dae daa nagtutugma sa record kan Philippine Statistics Authority (PSA).
Pigtawan duon man kan piskalya na dakulang kantidad nin confidential funds an marikas na nagastos, kabale na an P125-M na suboot nagastos sa laog sana nin 11 aldaw. Huli kaini, nagpaluwas nin notices of disallowance an COA na nagsusugo na ibalik an mga kuestionableng gastos.
Mientrastanto, sinabi kan House prosecution spokesperson asin Lanao del Sur Rep. Zia Alonto Adiong na an confidential asin intelligence funds nagdadanay sa irarom kan sakop kan COA’s audit asin dai pwedeng gamiton na mayong accountability.
