Nagtitinir na pig-iimbestigaran an 20 Pilipinong seafarers sa South Korea katakod kan nadiskubre kan mga otoridad na duwang tonelada kan cocaine na nakatago sa saindang barko.
Sigun ki Department of Migrant Workers (DMW) Secretary Hans Leo Cacdac, presenteng pig-uusig an gabos nin Pinoy crew na lunad kan barko sa may daungan sa eastern coastline kan South Korea.
Nakipaghilingan naman soboot an abogado gikan sa maysadiri kan barko sa 20 Pinoy seafarers siringman, nakatalaan na mag-iba an saro pang abogado gikan sa DMW sa defense team. Nakikipag-koordinar naman an DMW sa mga pamilya kan mga seafarer asin sa mga opisyal kan Embahada kan Pilipinas sa Seoul.
Marurumdoman, naenot ng naglusar nin imbestigasyon an local authorities sa Norweigian-flagged vessel makalihis makaresiber nin intelligence gikan sa US agencies na naglalaog ini kan nakatagong narcotics.
Makalihis na magdaog sa east coast port sa SoKor, tulos na pigsalakay kan mga otoridad an barko asin digdi na nadiskubre an nakatagong compartment sa likod kan engine room kan barko asin nadukayan an mga iligal na droga na nakasupot sa 56 na sako.
Naenot ng pigreport kan Korea Coast Guard na naglayag an barko gikan sa Mexico asin nagpundo sa Ecuador, Panama asin China antes magdaong sa pantalan kan SoKor.
Ini an pigkokonsiderar na pinakadakulang drug bust operation sa historya kan South Korea na igwa nin pigkakarkulong street value na one trillion won o P39.3 billion.
