Nairehistro kan Philippine Institute of Volcanology and Seismology (PHIVOLCS) an 256 rockfall events asin 41 pyroclastic density currents (PDCs o “uson”) sa Mayon Volcano sa Albay sa nakalihis na 24 oras, sigun sa report. Padagos man an pagluwas nin lava asin mahihiling pa man an crater glow sa mata kan tao.
Kan Sabado, nairehistro an 777 toneladang sulfur dioxide emissions. Moderate plumes gikan sa crater an nagsakat hasta sa 200 metro antes na humimlay sa hilaga-silangan.
Nagtitinir na Alert Level 3 (Intensified/Magmatic Unrest) an Mayon. Inabisuhan kan PHIVOLCS na bawal an paglaog sa 6-kilometrong Permanent Danger Zone (PDZ) asin magin maingat sa Extended Danger Zone (EDZ).
Ipinagbabawal man an pagpapalupad kan eroplano harani sa bulkan.
Sigun sa PHIVOLCS, peligro gikan sa Mayon an kinababalihan kan:
–Rockfalls o landslides
–Ballistic fragments
–Lava flows asin lava fountaining
–Pyroclastic density currents (PDCs)
–Moderate-sized explosions
–Lahars kun makusog asin haloy an uran
Padagos na minomonitor an bulkan para sa kasalbaduhan kan publiko.
