Maabot sa 342 na OFWs asin pamilya ninda an nakaresibe nin tig 25 kilos na bagas sa ikaduwang wave kan rice assistance para sa mga apektado kan Super Typhoon Uwan.
Sa intrevista kan Bombo Radyo Naga kay Tobias M. Obrero Jr. – Peso Manager, Basud, Camarines Norte, sinaysay ginibo an distribusyon para sa mga OFW beneficiaries na dai nakaresibe nin ayuda sa enot na distribusyon.
Base sa record, 424 na benepisyaryo an pigtarget para sa second wave, alagad 342 sana talaga an naitao huli sa kakulangan nin mga dokumento asin kawaran nin OWWA records kan nagkapirang aplikante.
Piglinaw man ni Obrero na dae na magkakaigwa nin third wave kan rice distribution sa Basud huli natapos na an nakatalaan na distribusyon sa banwaan.
Mientras tanto, nakatalaan man giraray na isagibo an rice assistance distribution sa iba pang mga banwaan sa Camarines Norte, kabale na an Mercedes, Vinzons asin Talisay.
