Kinondena kan Persons with Disability Affairs Office (PDAO) kan Camarines Norte an ano man na porma nin panlalait, bullying asin diskriminasyon kontra sa mga Person with Disabilities (PWDs), kasunod kan kontrobersiya na nag-ugat sa sarong podcast na nagin sentro nin kritisismo sa social media.
Sa intrevista kan Bombo Radyo Naga kay DR. Rex A. Bernardo, ED.D | Provincial Department Head, Persons with Disability Affairs Office—Camarines Norte, sinabi kaini na na bako nang bago sa mga Persons with Disabilities an pag-atubang sa diskriminasyon, kun sain an iba sainda nakakaeksperyensya nin pagmamaliit asin pagkuwestiyon sa saindang halaga sa sosyedad, hale pa kan saindang pagkamuya.
Segun ki Bernardo, dakulang epekto kan siring na mga pahayag an sa dignidad, kumpiyansa sa sadiri asin emosyonal na kamugtakan kan mga Persons with Disabilities. Binigyang-diin niya na an pagkakaigwa nin kapansanan bako dapat gamiton na rason tanganing laitin o pakapahuy-an an sarong tawo, labi na sa online platforms kun sain mas dakul an nakakakua kan impormasyon.
Ipinaliwanag man niya na sa irarom kan Republic Act No. 7277 o Magna Carta for Persons with Disabilities, na inamyendahan kan Republic Act No. 9442, ipinagbabawal an public ridicule, mockery, vilification asin humiliation kontra sa mga PWD. An siring na mga paglabag pwedeng magresulta sa legal na pananagutan, depende sa mga sirkumstansiya asin naaangay na probisyon kan ley.
Dugang pa digdi, nanawagan an opisyal sa mga content creator, media practitioner asin sa publiko na magin responsable sa paggibo nin mga post, video asin iba pang online content. An kalayaan sa pamamahayag asin ekspresyon, aniya, kaiba dapat an paggalang sa dignidad asin mga karapatan kan iba.
Ibinunyag man ni Bernardo na kaiba sa mga reklamong nakakaabot sa opisina an dai pagtao nin diskwento sa mga Persons with Disabilities asin an pag-eksena kan ibang establisimyento sa pag-ako kan mga PWD identification card. Ipinaliwanag niya na sa panahon nin transisyon sa Unified Persons with Disabilities ID, dapat pangonotan kan mga establisimyento an mga balidong dating ID, segun sa umiiral na mga patakaran.
Tinawan-duon man niya an mga hamon na atubangon kan mga PWD sa edukasyon asin empleyo, kun sain may mga indibidwal na dai nakakaakses sa mga oportunidad dahil sa saindang kondisyon. Para sa PDAO, mahalaga an mas dakulang suporta, inklusibong mga programa asin mas marhay na pag-aruga hale sa gobyerno asin pribadong sektor.
Bilang parte kan mga hakbang sa pagpapalawak kan kamugtakan kan mga Persons with Disabilities, sinabi ni Bernardo na naggigibo an PDAO nin mga kampanya asin impormasyon online, kaiba an pag-develop nin module sa inclusive language tanganing matukdoan an publiko sa tamang paggamit nin mga termino asin sa paggalang sa mga tawo na may kapansanan.
Nangapudan an opisyal sa publiko na gamiton an tamang lengguwahe asin konsultahon an sektor nin mga Persons with Disabilities kun may pagduwa-duwa sa tamang pagt-apod sainda.
Para sa PDAO Camarines Norte, an pagrespeto sa mga Persons with Disabilities bako sana responsibilidad kan gobyerno, kundi obligasyon kan gabos tanganing makabuo nin sosyedad na inklusibo, patas asin may dignidad para sa gabos.
